زندگی | چودھری افضل حق

مذکورہ ادبی کاوِش کے مآخذ بارے متعدد آرا ہیں تاھم چودھری صاحب خود اس کے مآخذات کی تردید کرتے ہیں۔اُن کے مطابق اس کتاب کی اساس"جیسا کروگے ویسا بھروگے" اصول پر ہے۔دیکھا جائے تو "زندگی "خیروالناس من ینفع الناس کی تفسیر اور بنِ نوعِ انسان میں زندگی کا شعور اُجاگر کرنے کی ایک سعی جلیلہ ہے۔یہ کتاب انسان کو عملی زندگی کے راہ نُما اصولوں سے آگاہ کرتی ہے۔

دراصل "زندگی "اقبال کی جاوید نامہ اور دانتے کی ڈیوائن کامیڈی سے مماثل تخیلاتی اور تمثیلی انداز کی کتاب ہے۔اس میں ایک ایسے شخص کی کہانی بیان ہوئی ہے جو بےراہ روی اور عیش پرستانہ زندگی گزارنے کی وجہ سے ذلت و رسوائی کا شکار تو ہوتا ہے لیکن بالآخر عبرت حاصل کرکے اپنی زندگی کو سدھرنے پر توجہ دیتا ہے۔افضل حق نے اپنی اس کتاب کے آخری باب میں موت کے بعد قبر کے احوال، ،قیامت،جہنم، اعراف اور جنت وغیرہ مقامات کا فن کارانہ نقشہ کشی کی ہے۔مجموعی طور پر "زندگی" انسانی عُروج و پستی کی داستان ہے۔